-El la historio de la Juna Koro Esperantista Asocio (Zalaegerszeg-Hungario)-

En 1972 oni finkonstruis la Junularan kaj Pioniran Domon, en kiu ni sukcesis organizi Esperanto-lingvokurson. La pli fruaj esperantistoj kaj la novaj gelernantoj ankoraŭ samjare fondis novan Esperanto-klubon en Zalaegerszeg, nomita Juna Koro. La unua prezidanto estis Gaál János, kiu nuntempe en urbo Sárvár laboras por Esperanto-celoj. La klubo eldonis propran eldonaĵon kun titolo Eroj. Ĝin redaktis Kovács Béla. Aperis 17 numeroj, kiuj troveblas ankaŭ en Fajszi kolektaĵo. Li redaktis poste la revueton Literatura folio. Nuntempe Béla loĝas en urbo Kaposvár, kaj eldonas la reprezentativan revueton Vesperto. Inter la unuaj lokaj gelernantoj estis Felső Pál, kiu laboris en gvidantaro de TEJO dum la UK en 1966. Poste li organizis radiodissendojn en Esperanto el urbo Pécs. Lia edzino, Dr-ino Szabó Flóra estis ĉefsekretariino de Universala Esperanto Asocio en Rotterdam. Ili ankaŭ nuntempe estas membroj de Juna Koro. Lendvay Csaba dum jaroj estis ĉefsekretario de TEJO dum la Meksika periodo kaj en Vancouvero.

En la jaro 1978 ni invitis al Zalaegerszeg "JER"-on. Pli ol 200 gejunuloj kolektiĝis en la Junularo Domo kaj pli multaj partoprenis la demonstracion okaze de 1-a de majo.

Ni havis gastojn el Pollando, Germanio, Argentino, Sudkoreo, Israelo, Sovetunio, Jugoslavio kaj ankoraŭ el 20 diversaj landoj.

En la jaro 1983 el nia klubo Juna Koro 23 gejunuloj  laboris kiel helpantoj de la Universala Kongreso en Budapeŝto.

Dum la okdekaj jaroj plurfoje ni organizis nian propran fremdultrafikan programeron ŜER (Ŝohollara Esperanto-Renkontiĝo). Foje la tuta grupo biciklis al Varazdin.

En la jaro1985 25 klubanoj partoprenis la Internacian Junularan Kongreson en Eringerfeld (Germanio). Ni eldonis nian duan kantareton kaj la 25 Juna Koro-anoj en Esperanto-uniformo kantis sur la scenejo de la kongreso. En tiŭ ĉi jaro ni havis altan honoron. Nia klubano Ódor György reprezentis HEJ-on (Hungara Esperanto Junularo) en Moskvo, okaze de la Tutmonda Junulara Renkontiĝo.

Valoras Zamenhof-reliefon skulptis Takács Tibor, kaj la kluban flagon faris Tuboly József.

Dum kelkaj jaroj ni laboris en la Sindikata Domo. Ni kolektiĝis ĉiuvendrede, laborante diligente.

En 1987 la Esperanto-centjariĝo donis multan okazon por festi. Niaj karavane veturis al IJK (Krakovo) kaj  al UK (Varsovio). Kapcsándi Ferenc kaj Ódor György estis invititaj al la jubilea kunsido de HEA en la Parlamento. Okaze de la centjariĝo de Esperanto ni faris grandan ekspozicion en la Junulara Domo, festante ankaŭ la dekkvinan naskiĝtagon de nia klubo.

En 1989 je la invito de la Fervojista Kulturdomo ni translokiĝis, kaj post unu jaro ni denove organizis la Tutlandan Fervojistan Esperanto-Renkontiĝon okaze de la centjara datreveno de la inaŭguro de la fervojlinio inter Boba kaj Csáktornya. Ni veturis kun 250 gastoj per nostalgia trajno al Lenti kaj inter Lendva kaj Csáktornya.

En la jaro 1997 en urbo Graz okazis la Ekumena E-Kongreso. Hejmenveturinte la partoprenantoj organizis postkongreson helpe de Juna Koro. Nin tre kore akceptis la lokaj religiaj organizaĵoj.

Ni eldonis specialan reklam-lernolibron kaj poŝtformajn kovertojn kun Esperanto kaj nacilingvaj logoj.

Ni partoprenis kunsidojn de Alp-Adria Asocio en Italio, Kroatio, Slovenio.

Kaj jen, ni prezentas nian hejmpaĝon en Esperanto kaj hungarlingve pri Juna Koro. Niaj helpemaj klubanoj donis la ideon kaj ilian laboron por prezenti nian asocion.

Dum la jardekoj ni edukis aliajn aktivajn esperantistojn, kies hejmpaĝoj prezentas sian diligentan laboron.

Ni ne laciĝis. Ni instruas novajn gejunulojn, ni helpos la estiĝon de la E-celoj!

                                                                                                Kapcsándi Ferenc